මුස්ලිම් කතුන්ට ලස්සනට අදින්න බැරිද?

ඉස්ලාම් කාන්තාවගේ සාම්ප්‍රදායික ඇදුම මෑතක සිට ජාතික මෙන්ම ජාත්‍යන්තර වශයෙන් ද මහත් කතාබහට ලක්වන්නකි. එහෙත් ඒ මුල්කොට ඉස්ලාම් කතුන්ගේ ඇදුම් සම්බන්ධයෙන් ඉදිරිපත් වන විවේචන බොහොමයක් ඉස්ලාම් සමාජයෙන් ප්‍රතික්ෂේප වන බව පෙනේ. ඒ ඊට අදාළ නිවැරදි වදන් වෙනුවට අදාළ නොවන වදන් භාවිත කරමින් ගොනුවන නිසා ය. 

            ඉස්ලාමීය කාන්තාවන් අදින හිස, දෑතේ මැණික් කටු සහ පයේ වළලුකර දක්වා වැසෙන එහෙත් මුහුණ නොවැසෙන ඇදුම හදුන්වන්නේ ''හිජාබ්'' යනුවෙනි. මෙය සමස්ත මුස්ලිම් කතුන්ගේ ඇදුම සදහා යොදන ව්‍යවහාරයක් ද වේ. දෙනෙත පමණක් නිරාවරණය වන විට මෙම ඇදුම සැකසුන විට ඊට ''නිකාබ්'' යැයි කියනු ලැබේ. එමෙන්ම දෙනෙත පවා බාහිර පුද්ගලයින්ට නොපෙනෙන සේ සැකසුන කාන්තා ඇදුම ''බුර්කා'' යනුවෙන් හැදින්වේ. මෙය ෆර්සියන් බසින් ''ෆර්දා'' යනුවෙන් හදුන්වනු ලබයි. ඉස්ලාම් කතුන්ගේ ඇදුම සකස් විය යුත්තේ ඉස්ලාමයේ මූලික ආගමික ග්‍රන්ථය වන අල් කුරානයේ 24 වන පරිච්ඡේදයේ 30-31 වන පාඨවලට අනුව ය. 

        එහි දී ''මන්රම්'' යනුවෙන් විස්තර කරනුයේ පුද්ගලයින්ගෙන් බැහැරට යන විට ඉස්ලාමීය කාන්තාව හැද සිටිය යුතු ආකාරයයි. ඉහත සදහන් කුරාණ පාඨයට ඉස්ලාමීය කාන්තාවන්ටත් තම ස්වාමිපුරුෂයන්, පියවරුන්, සැමියාගේ පියවරුන්, තම පිරිමි දරුවන්, සැමියාගේ පිරිමි දරුවන් , තම සොයුරියන්, ඔවුන්ගේ දරුවන්, තම අන්තේවාසික කතුන්, තම වහලුන්, කාමරාගී නොපිබිදෙන මහල්ලන් සහ කාන්තා සිරුර ගැන නොවැටහෙන කුඩා පිරිමි දරුවන් යන පිරිස් හැරුණු කොට අන් සියල්ලන් හමුවේදීම ඇදුමින්, පැළදුමින් විශේෂ ආචාර ධර්ම පද්ධතියක් අනුගමනය කළ යුතුය. 

                  මෙහිදී ඉහත සදහන් අයුරින් ශරීරය සම්පූර්ණයෙන් වැසෙන ඇදුම් අදින ඉස්ලාම් කතුන්ට දන්වා ඇත්තේ ''පිල්බාබ්'' නමින් යුතු හිස වසන සලුවෙන් ලැමැද වසා ගන්නා ලෙස හා සිරුරේ ඉන්ද්‍රිය පිටතට නෙරා එන අයුරින් ශරීරයට සිර වූ ඇදුම් ඇදීමෙන් වළකින ලෙසයි. අල් කුරාණයේ 33 වන පරිච්ඡේදයේ 59 වන පාඨයෙන් මෙය මනාව පැහැදිලි වේ. එමෙන්ම ඇදුම් පැළදුම් පිළිබද මෙම ආචාර සම්ප්‍රදාය කාන්තාවන්ගේ අනන්‍යතාව තහවුරු කර ගැනීමටත්, ඔවුන්ගේ විනය ආරක්ෂා වීමටත්, අතවර වලින් මිදීමටත් මුල් වන බව පෙන්වා දෙයි. කුරාණය ඉස්ලාමීය කාන්තාවන් ගමන් කරන විට පොළොවට තදින් පය ගැටෙන සේ ගමන් නොකළ යුතු බව ද අවධාරණය කරයි. ඒ ඔවුන් ගමන් කිරීමේ දී නිතඹ සැලෙන අන්දම අන්‍යයන්ට ප්‍රදර්ශනය වීම වළකාලනු පිණිසය. මෙය කුරාණයේ 24 වන පරිච්ඡේදයේ 31 වන පාඨයෙන් ප්‍රකාශ වේ. 

                     මුස්ලිම් කතුන්ගේ ඇදුම් විලාසිතා ද හිජාබ් හෝ අබායා යනුවෙන් හදුන්වනු ලැබේ. මූලික ඉස්ලාම් ආගමික අණපනත් අනුව සැකසුණු මෙම විලාසිතා ලොව පුරා පැතිර ඇති අතර මේවායේ සුන්දරත්වය අනුව මුස්ලිම් නොවන කාන්තාවන් පවා මෙම විලාසිතා අනුගමනය කිරීමට බැදී සිටිති.  මේවා විවිධ පැහැයෙන්, විවිධ මෝස්තරවලින් හා රේන්ද, එම්බ්‍රොයිඩර් වලින් හැඩගැන් වූ විලාසිතා ලොව පුරා විසිරී පවතී. සිංහල කතුන් තුළ ද මෙම ඇදුම් විලාසිතාවන්ට බෙහෙවින් ඇල්මක් දක්නට ඇත.